Parlament májilisiniń depýtaty Baqytjan Bazarbek Ǵylym jáne joǵary bilim mınıstri Saıasat Nurbekke:

– Dúısenbi kúni Almatyda jer silkindi. Jaqynda Seısmologıa ınstıtýtynyń ǵylymı qyzmetkerlerimen kezdestim. İs júzinde atalǵan ınstıtýt qyzmetkerleri beısharanyń kúnin keship otyr. Eshqandaı ǵylymı jobalary qabyldanbaǵan. Jobalaryn mınıstrlikke joldasa da, olardy keri qaıtaryp jatyr, ıaǵnı qarjylandyrýdy qysqartyp tastaǵan. Qazir Seısmologıa ınstıtýty Tótenshe jaǵdaılar mınıstrliginiń qaramaǵynda. Seısmolog ǵalymdar ınstıtýtty Ǵylym mınıstrligine qaıtarý kerek ekenin aıtyp otyr. Osyǵan ne aıtasyz?, – degen saýal tastady.

Saıasat Nurbek kezinde birqatar ınstıtýt salalyq mınıstrlikterdiń quramyna berilgenin rastaı otyryp, usynysty quptaıtynyn jetkizdi.

– Seısmologıa ınstıtýty da Tótenshe jaǵdaılar mınıstrliginde. Olarda qazir tolyqqandy qarjylandyrý bolmaǵany ókinishti. Sonymen qatar, bizdiń mınıstrlik te olardyń ishki prosedýralaryn qoldaı almaıdy. Sondyqtan atalǵan ınstıtýt bizge qaıtarylsa, qarsy bolmaımyz. Biraq bıyl qomaqty grantty Seısmologıa ınstıtýtyna bólip otyrmyz, ıaǵnı 3,5 mlrd teńge somasynda. Qazir olardyń barlyq ótinimin pysyqtap, Úkimet janyndaǵy komısıanyń qaraýyna shyǵaryp otyrmyz», – dep jaýap berdi mınıstr.